main ek sada lafz tha mansub us se kya hua

maiñ ek saada lafz thā mansūb us se kyā huā

us ne navāzā is tarah maiñ ho gayā huuñ qāfiya

duniyā hiqārat se jise be-faiz kahtī thī vahī

har-sū ujālā kar rahā hai raat se laḌ kar diyā

pahle nazar ke rāste dil meñ rahā hai kuchh dinoñ

vo ab ragoñ meñ aa gayā hai ishq us se yuuñ kiyā

kyā bīt.tī hai dil pe us ko ye ḳhabar hai hī nahīñ

kaise batā.ūñ maiñ use nīñdeñ uḌiiñ pāgal huā

masrūfiyat donoñ kī aisī mil nahīñ paate magar

vo har tarah se paas hai ik jism hī to hai judā

ik din ḳhudā se maañg lī ham ne zarā sī raushnī

us kī ināyat ye huī sūraj uThā kar de diyā

kyā kyā nazāre dekhtī hai aañkh merī rāt-din

āsāñ nahīñ thā jo kabhī par ishq meñ vo bhī huā

main ek sada lafz tha mansub us se kya hua

us ne nawaza is tarah main ho gaya hun qafiya

duniya hiqarat se jise be-faiz kahti thi wahi

har-su ujala kar raha hai raat se laD kar diya

pahle nazar ke raste dil mein raha hai kuchh dinon

wo ab ragon mein aa gaya hai ishq us se yun kiya

kya bitti hai dil pe us ko ye KHabar hai hi nahin

kaise bataun main use ninden uDin pagal hua

masrufiyat donon ki aisi mil nahin pate magar

wo har tarah se pas hai ek jism hi to hai juda

ek din KHuda se mang li hum ne zara si raushni

us ki inayat ye hui suraj uTha kar de diya

kya kya nazare dekhti hai aankh meri raat-din

aasan nahin tha jo kabhi par ishq mein wo bhi hua