main gahri nind mein tha jab ki ye bheji gai duniya

maiñ gahrī niiñd meñ thā jab ki ye bhejī ga.ī duniyā

ab isti.māl karnī hai mujhe de dī ga.ī duniyā

ba-vaqt-e-sub.h lagtā thā ki kuchh-kuchh dastaras meñ hai

jo aa.ī shaam hāthoñ se mire le lī ga.ī duniyā

paḌī hai jā-ba-jā TuuTe hue shīshe ke TukḌoñ sī

kisī anjān khiḌkī se kabhī pheñkī ga.ī duniyā

mire dar par na.e din ko mahakte phuul kī sūrat

sahar jo rakh ga.ī thī shaam ko letī ga.ī duniyā

ye apnā desh hai aa jā.eñge vāpas yahīñ phir bhī

chalo DhūñDeñ use jo ḳhvāb meñ dekhī ga.ī duniyā

main gahri nind mein tha jab ki ye bheji gai duniya

ab istimal karni hai mujhe de di gai duniya

ba-waqt-e-subh lagta tha ki kuchh-kuchh dastaras mein hai

jo aai sham hathon se mere le li gai duniya

paDi hai ja-ba-ja TuTe hue shishe ke TukDon si

kisi anjaan khiDki se kabhi phenki gai duniya

mere dar par nae din ko mahakte phul ki surat

sahar jo rakh gai thi sham ko leti gai duniya

ye apna desh hai aa jaenge wapas yahin phir bhi

chalo DhunDen use jo KHwab mein dekhi gai duniya