main ghazal ka harf-e-imkan masnawi ka KHwab hun

maiñ ġhazal kā harf-e-imkāñ masnavī kā ḳhvāb huuñ

apnī sab rūdād likhne ke liye betāb huuñ

maiñ babūloñ kī tarah phūlā-phalā huuñ dasht meñ

abr aa.e yā na aa.e maiñ sadā shādāb huuñ

mauj-e-sahbā huuñ agar hai zarf yārāñ aa.ina

kuchh ġhubār aa.e nazar to sar-ba-sar girdāb huuñ

maiñ huuñ ik vīrāñ sitāra-gar hai koī nā-shanās

koī hai raushan-nazar to chashma-e-mahtāb huuñ

kyā samajh kar mujh se uljhe haiñ 'hasan' lail-o-nahār

aap apnā roz-o-shab huuñ aap ālam-tāb huuñ

main ghazal ka harf-e-imkan masnawi ka KHwab hun

apni sab rudad likhne ke liye betab hun

main babulon ki tarah phula-phala hun dasht mein

abr aae ya na aae main sada shadab hun

mauj-e-sahba hun agar hai zarf yaran aaina

kuchh ghubar aae nazar to sar-ba-sar girdab hun

main hun ek viran sitara-gar hai koi na-shanas

koi hai raushan-nazar to chashma-e-mahtab hun

kya samajh kar mujh se uljhe hain 'hasan' lail-o-nahaar

aap apna roz-o-shab hun aap aalam-tab hun