main gila kar raha hun qismat ka

maiñ gila kar rahā huuñ qismat kā

kaun mauqa hai ye shikāyat kā

thā asar dil meñ kuchh mohabbat kā

pūchhte the nishān turbat kā

'badr' vārafta ho ke hazrat kā

kis se hai idda.ā raqābat kā

Dar na thā dil meñ kuchh qayāmat kā

thā bharosā tirī shafā.at kā

jal uThā dil meñ daaġh hasrat kā

bujh gayā jab charāġh turbat kā

sun ke vaa.iz kī pī ga.e mai-kash

muqtazā thā yahī sharāfat kā

araq-ālūda ruḳh kā vasf likhā

itr khīñchā gul-e-latāfat kā

shab-e-furqat thī raat turbat kī

roz-e-furqat thā din qayāmat kā

nahīñ miltā adā-shanāsoñ ko

tolā māsha mizāj hazrat kā

zindagī kā bhī Thekā lete ho

va.ada karte to ho qayāmat kā

vaah re husn terī ra.anā.ī

rang badlā hayā-tabī.at kā

na to mai hai na jām-o-sāqī hai

rang phīkā hai aaj sohbat kā

shab-e-gesū se bhī darāz hai ye

tuul kyā kahiye roz-e-furqat kā

rattī sīm-e-qamar kī chamkī hai

auj dekho to ahl-e-daulat kā

past se past ziina hai kursī

aap ke bām-e-arsh-rif.at kā

kis ġhazab kī hai sāñvlī sūrat

shor aalam meñ hai malāhat kā

be-haqīqat ye ḳhaak kā putlā

ik namūna hai terī san.at kā

aaj kyā huuñ azal se parvāna

maiñ tirī sham.a-e-bazm-e-qurbat kā

dasht-e-ġhurbat meñ mere sar par thā

sā.ebāñ terī nīlgūñ chhat kā

'badr' tum bhī to ho banī hāshim

faḳhr bejā nahīñ siyādat kā

'badr'-e-marhūm ko ḳhudā baḳhshe

aadmī thā baḌī muravvat kā

main gila kar raha hun qismat ka

kaun mauqa hai ye shikayat ka

tha asar dil mein kuchh mohabbat ka

puchhte the nishan turbat ka

'badr' warafta ho ke hazrat ka

kis se hai iddaa raqabat ka

Dar na tha dil mein kuchh qayamat ka

tha bharosa teri shafaat ka

jal uTha dil mein dagh hasrat ka

bujh gaya jab charagh turbat ka

sun ke waiz ki pi gae mai-kash

muqtaza tha yahi sharafat ka

araq-aluda ruKH ka wasf likha

itr khincha gul-e-latafat ka

shab-e-furqat thi raat turbat ki

roz-e-furqat tha din qayamat ka

nahin milta ada-shanason ko

tola masha mizaj hazrat ka

zindagi ka bhi Theka lete ho

wada karte to ho qayamat ka

wah re husn teri ranai

rang badla haya-tabiat ka

na to mai hai na jam-o-saqi hai

rang phika hai aaj sohbat ka

shab-e-gesu se bhi daraaz hai ye

tul kya kahiye roz-e-furqat ka

ratti sim-e-qamar ki chamki hai

auj dekho to ahl-e-daulat ka

past se past zina hai kursi

aap ke baam-e-arsh-rifat ka

kis ghazab ki hai sanwli surat

shor aalam mein hai malahat ka

be-haqiqat ye KHak ka putla

ek namuna hai teri sanat ka

aaj kya hun azal se parwana

main teri shama-e-bazm-e-qurbat ka

dasht-e-ghurbat mein mere sar par tha

saeban teri nilgun chhat ka

'badr' tum bhi to ho bani hashim

faKHr beja nahin siyaadat ka

'badr'-e-marhum ko KHuda baKHshe

aadmi tha baDi murawwat ka