میں گر کر شاخ سے اڑنے لگا ہوں

میں گر کر شاخ سے اڑنے لگا ہوں

اچانک کتنا اونچا ہو گیا ہوں

ستم سہہ کر بھی چپ رہنے لگا ہوں

مجھے لگتا ہے شاید مر گیا ہوں

کہوں کیسے کہ وہ میرا نہیں ہے

جسے سو بار اپنا کہہ چکا ہوں

مجھے شاید خدا کا ڈر نہیں ہے

خودی محفوظ رکھنا چاہتا ہوں

مرے بارے میں وہ کیا سوچتا ہے

یہی اک بات اکثر سوچتا ہوں

اصولوں کی عمارت گر چکی ہے

میں خود اپنے ہی ملبے میں دبا ہوں

مجھے فاروقؔ کوئی نوٹ کر لے

کئی انجان گلیوں کا پتا ہوں