میں حالت کیا کہوں درد نہاں کی

میں حالت کیا کہوں درد نہاں کی

عیاں کو کچھ نہیں حاجت بیاں کی

مری صورت سے ظاہر ہے مرا حال

ضرورت کیا مجھے شرح و بیاں کی

زباں قاصر ہے عرض حال دل سے

ضرورت ہے اسے اک ترجماں کی

سمجھنے پر اگر ہو کوئی مائل

خموشی بھی ہے اک صورت بیاں کی

جفا کی کیا شکایت ہو کہ اے دل

جفا عادت ہے میرے مہرباں کی

جو سمجھے شکر کو بھی اک شکایت

شکایت کیا ہو ایسے بد گماں کی

نہیں جس کو خبر اپنی بھی اس کو

خبر کیا ہو مرے درد نہاں کی

حسینان جہاں دیکھے ہیں میں نے

ہیں سب ناکام شکلیں اس جواں کی

کیا تھا میں نے کب الفت کا دعویٰ

ضرورت کیا تھی میرے امتحاں کی

ملی قید قفس کے بعد کوئی

خبر مجھ کو نہ میرے آشیاں کی

جزاک اللہ جلیلؔ اچھی غزل ہے

بھلا کیا بات اس حسن بیاں کی