main hath baDhaun kya daman-e-gulistan tak

maiñ haath baḌhā.ūñ kyā dāmān-e-gulistāñ tak

hai rañg-e-gul-e-lāla nairañg-e-bahārāñ tak

phūloñ se rahā ḳhālī dāmān-e-vafā apnā

kāñTe hī mile ham ko gulshan se bayābāñ tak

uThte haiñ bagūle to sahrā kī taraf jaa.eñ

dīvānoñ kī duniyā hai dāman se garebāñ tak

kaT jā.eñgī ik din sab ālām kī zanjīreñ

ye qaid-e-musalsal hai majbūrī-e-insāñ tak

be-soz koī naġhma maqbūl nahīñ hotā

mizrāb-e-ġham-e-dil ko le jaao rag-e-jāñ tak

kāshāne ġharīboñ ke sar apnā uThā.eñge

miTTī ke charāġhoñ kī lau jā.egī aivāñ tak

turfa koī kyā jaane ġham ahl-e-mohabbat kā

jaatī hai nazar kis kī zaḳhm-e-dil-e-insāñ tak

main hath baDhaun kya daman-e-gulistan tak

hai rang-e-gul-e-lala nairang-e-bahaaran tak

phulon se raha KHali daman-e-wafa apna

kanTe hi mile hum ko gulshan se bayaban tak

uThte hain bagule to sahra ki taraf jaen

diwanon ki duniya hai daman se gareban tak

kaT jaengi ek din sab aalam ki zanjiren

ye qaid-e-musalsal hai majburi-e-insan tak

be-soz koi naghma maqbul nahin hota

mizrab-e-gham-e-dil ko le jao rag-e-jaan tak

kashane gharibon ke sar apna uThaenge

miTTi ke charaghon ki lau jaegi aiwan tak

turfa koi kya jaane gham ahl-e-mohabbat ka

jati hai nazar kis ki zaKHm-e-dil-e-insan tak