main hadd-e-la-makani chahta hun

maiñ hadd-e-lā-makānī chāhtā huuñ

ye kaisī sargirānī chāhtā huuñ

tirī āñkhoñ meñ paanī chāhtā huuñ

bas itnī mehrbānī chāhtā huuñ

jise sunte hī so jaate the bachche

vahī bhūlī kahānī chāhtā huuñ

ye hai merī tabī.at kā taqāzā

har ik pal imtihānī chāhtā huuñ

nahīñ lagtā mirā ab shahr meñ jī

haqīqat dāstānī chāhtā huuñ

ka.ī rātoñ se niiñd aa.ī nahīñ hai

maiñ kuchh jhūTī kahānī chāhtā huuñ

mirī is sādgī kī daad to de

tirā va.ada zabānī chāhtā huuñ

koī gum-karda-e-manzil mile to

maiñ apnā naqsh-e-sānī chāhtā huuñ

tumhārī guftugū meñ 'shān' sāhab

ġhazal jaisī ravānī chāhtā huuñ

main hadd-e-la-makani chahta hun

ye kaisi sargirani chahta hun

teri aankhon mein pani chahta hun

bas itni mehrbani chahta hun

jise sunte hi so jate the bachche

wahi bhuli kahani chahta hun

ye hai meri tabiat ka taqaza

har ek pal imtihani chahta hun

nahin lagta mera ab shahr mein ji

haqiqat dastani chahta hun

kai raaton se nind aai nahin hai

main kuchh jhuTi kahani chahta hun

meri is sadgi ki dad to de

tera wada zabani chahta hun

koi gum-karda-e-manzil mile to

main apna naqsh-e-sani chahta hun

tumhaari guftugu mein 'shan' sahab

ghazal jaisi rawani chahta hun