main hajw ek apne har qaside ki rad mein tahrir kar raha hun

maiñ hajv ik apne har qasīde kī rad meñ tahrīr kar rahā huuñ

ki āp-apne se huuñ muḳhātab ḳhud apnī tahqīr kar rahā huuñ

kahāñ hai fursat nashāt o ġham kī ki ḳhud ko tasḳhīr kar rahā huuñ

lahū meñ girdāb Dāltā huuñ nafas ko shamshīr kar rahā huuñ

mirī kahānī raqam huī hai havā ke aurāq-e-muntashir par

maiñ ḳhaak ke rañg-e-ġhair-fānī ko apnī tasvīr kar rahā huuñ

maiñ sañg-o-ḳhisht-e-anā kī bārish meñ kab kā mismār ho chukā huuñ

ab inkisārī kī narm miTTī se apnī ta.amīr kar rahā huuñ

ye ishq kī hai fusūñ-tarāzī ki vahshatoñ kī karishma-sāzī

kamand ḳhushbū pe Dāltā huuñ havā ko zanjīr kar rahā huuñ

shanvā-varī ke usuul mujh ko batā.egā koī kyā ki maiñ ne

kiyā hai maujoñ kā ḳhair-maqdam bhañvar kī tauqīr kar rahā huuñ

tum apne dariyāoñ par biThāo hazār pahre magar mujhe kyā

maiñ saare ḳhvāboñ ko sab sarāboñ ko apnī jāgīr kar rahā huuñ

main hajw ek apne har qaside ki rad mein tahrir kar raha hun

ki aap-apne se hun muKHatab KHud apni tahqir kar raha hun

kahan hai fursat nashat o gham ki ki KHud ko tasKHir kar raha hun

lahu mein girdab Dalta hun nafas ko shamshir kar raha hun

meri kahani raqam hui hai hawa ke auraq-e-muntashir par

main KHak ke rang-e-ghair-fani ko apni taswir kar raha hun

main sang-o-KHisht-e-ana ki barish mein kab ka mismar ho chuka hun

ab inkisari ki narm miTTi se apni tamir kar raha hun

ye ishq ki hai fusun-taraazi ki wahshaton ki karishma-sazi

kamand KHushbu pe Dalta hun hawa ko zanjir kar raha hun

shanwa-wari ke usul mujh ko bataega koi kya ki main ne

kiya hai maujon ka KHair-maqdam bhanwar ki tauqir kar raha hun

tum apne dariyaon par biThao hazar pahre magar mujhe kya

main sare KHwabon ko sab sarabon ko apni jagir kar raha hun