main ham-nafasan jism hun wo jaan ki tarah tha

maiñ ham-nafasāñ jism huuñ vo jaañ kī tarah thā

maiñ dard huuñ vo dard ke unvāñ kī tarah thā

jis ke liye ik umr kueñ jhāñkte guzrī

vo māh-e-karachi mah-e-kan.āñ kī tarah thā

tū kaun thā kyā thā ki baras guzre par ab bhī

mahsūs ye hotā hai rag-e-jāñ kī tarah thā

jis ke liye kāñTā sā chubhā kartā thā dil meñ

pahlū meñ vo aayā to gulistāñ kī tarah thā

ik umr ulajhtā rahā duniyā kī havā se

kyā maiñ bhī tere kākul-e-pechāñ kī tarah thā

kuchh umr-e-gurezāñ se mire haath na aayā

har lamha tire gosha-e-dāmāñ kī tarah thā

Duube se kahāñ pyaas bujhī ahl-e-talab kī

maiñ vādī-e-gul meñ bhī bayābāñ kī tarah thā

jiinā to ġhazab hai magar ai umr ajab hai

tujh ko to ḳhabar hai vo mirī jaañ kī tarah thā

ai raat ke añdhiyāre meñ jaage hue lamho

DhūñDo use vo ḳhvāb-e-pareshāñ kī tarah thā

miTTī ko yahāñ paañv pakaḌnā nahīñ aatā

maiñ shahr meñ bhī gard ke tūfāñ kī tarah thā

lo harf-e-ġhazal ban ke numāyāñ huā 'bāqar'

kal ramz sifat ma.anī-e-pinhāñ kī tarah thā

main ham-nafasan jism hun wo jaan ki tarah tha

main dard hun wo dard ke unwan ki tarah tha

jis ke liye ek umr kuen jhankte guzri

wo mah-e-karachi mah-e-kanan ki tarah tha

tu kaun tha kya tha ki baras guzre par ab bhi

mahsus ye hota hai rag-e-jaan ki tarah tha

jis ke liye kanTa sa chubha karta tha dil mein

pahlu mein wo aaya to gulistan ki tarah tha

ek umr ulajhta raha duniya ki hawa se

kya main bhi tere kakul-e-pechan ki tarah tha

kuchh umr-e-gurezan se mere hath na aaya

har lamha tere gosha-e-daman ki tarah tha

Dube se kahan pyas bujhi ahl-e-talab ki

main wadi-e-gul mein bhi bayaban ki tarah tha

jina to ghazab hai magar ai umr ajab hai

tujh ko to KHabar hai wo meri jaan ki tarah tha

ai raat ke andhiyare mein jage hue lamho

DhunDo use wo KHwab-e-pareshan ki tarah tha

miTTi ko yahan panw pakaDna nahin aata

main shahr mein bhi gard ke tufan ki tarah tha

lo harf-e-ghazal ban ke numayan hua 'baqar'

kal ramz sifat mani-e-pinhan ki tarah tha