main haqiqat mein kabhi ghair pe mail na hua

maiñ haqīqat meñ kabhī ġhair pe maa.il na huā

na milā us se jo vaj.h-e-ḳhalish-e-dil na huā

umr-bhar terī tamannā.eñ mire dil meñ rahīñ

dil magar terī tamannāoñ ke qābil na huā

ho ga.ī dard ye darmāñ-talabī hī ya.anī

tum se milne se ba-juz ranj ke hāsil na huā

na ho sharminda jafā kar ke maiñ qurbāñ tere

ye ināyat bhī bahut hai ki tū ġhāfil na huā

sham-e-kushta kā vo manzar vo vidā.a-e-mahfil

ḳhair ye guzrī ki parvāna-e-mahfil na huā

log samjhā kiye har rang meñ shāmil mujh ko

varna 'maikash' maiñ kisī rang meñ shāmil na huā

main haqiqat mein kabhi ghair pe mail na hua

na mila us se jo wajh-e-KHalish-e-dil na hua

umr-bhar teri tamannaen mere dil mein rahin

dil magar teri tamannaon ke qabil na hua

ho gai dard ye darman-talabi hi yani

tum se milne se ba-juz ranj ke hasil na hua

na ho sharminda jafa kar ke main qurban tere

ye inayat bhi bahut hai ki tu ghafil na hua

sham-e-kushta ka wo manzar wo widaa-e-mahfil

KHair ye guzri ki parwana-e-mahfil na hua

log samjha kiye har rang mein shamil mujh ko

warna 'maikash' main kisi rang mein shamil na hua