میں حقیقت میں کبھی غیر پہ مائل نہ ہوا

میں حقیقت میں کبھی غیر پہ مائل نہ ہوا

نہ ملا اس سے جو وجہ خلش دل نہ ہوا

عمر بھر تیری تمنائیں مرے دل میں رہیں

دل مگر تیری تمناؤں کے قابل نہ ہوا

ہو گئی درد یہ درماں طلبی ہی یعنی

تم سے ملنے سے بجز رنج کے حاصل نہ ہوا

نہ ہو شرمندہ جفا کر کے میں قرباں تیرے

یہ عنایت بھی بہت ہے کہ تو غافل نہ ہوا

شمع کشتہ کا وہ منظر وہ وداع محفل

خیر یہ گزری کہ پروانۂ محفل نہ ہوا

لوگ سمجھا کئے ہر رنگ میں شامل مجھ کو

ورنہ میکشؔ میں کسی رنگ میں شامل نہ ہوا