main hi nahin hun barham us zulf-e-kaj-ada se

maiñ hī nahīñ huuñ barham us zulf-e-kaj-adā se

Tuk muñh tirā jo paa.eñ uljheñ abhī havā se

tum ne nikālne meñ kuchh kam na kiiñ jafā.eñ

ab tak jo tham rahe haiñ ham apnī hī vafā se

pahlī nigah meñ dil par barchhī sī lag ga.ī hai

pahuñche the intihā ko ham us kī ibtidā se

rakhnā qadam zamīñ par Tuk dekh kar pyāre

dil raah meñ paḌe haiñ lākhoñ ke naqsh-e-pā se

jā ai tabīb yaañ se itnā nahīñ samajhtā

bīmārī-e-mohabbat kis kī ga.ī davā se

maiñ āshiq-e-balā huuñ kartā huuñ us ko sajda

ḳhāk-e-qadam ko us kī jo aao karbalā se

mash.hūr thī buzurgī un kī sabhoñ se lekin

apne ta.iiñ ta.āruf chandāñ na thā ziyā se

aksar galī se us kī dekhā thā maiñ ne jaate

ho ga.e the is sabab se kuchh sūrat-āshnā se

kal un ko maiñ ne dekhā sar nañge pā-barahna

jaama jo hai galī meñ sau TukḌe jā-ba-jā se

dar-parda yuuñ maiñ un se pūchhā ki qibla-e-man

kyuuñ aaj is qadar haiñ āzurda-o-ḳhafā se

mahjūb se vo ho kar kahne lage na pūchho

mar jaa.eñ yā ilāhī chhūTeñ kahīñ balā se

ye turfa mājrā hai ik jā pe dil diyā hai

par qahr haiñ vahāñ ke lauñDe zarā zarā se

itnī sī umr meñ ye ayyāriyāñ haiñ karte

lete haiñ dil ko pahle de de bahut dilāse

jab dekhte haiñ aayā ab iḳhtiyār meñ dil

jo dekhiyo to phir pesh aate haiñ is adā se

maiñ ne kahā ki hazrat aap apnī tarf dekheñ

jo in butoñ se hogā so hogā vo ḳhudā se

be-iḳhtiyār ho kar bole ki sach hai sāhab

vāqif nahīñ hue ho ishq-e-havas-fazā se

dariyā ke rahne vaale kyā jāneñ is asar ko

paanī kī qadr pūchho un se jo haiñ piyāse

main hi nahin hun barham us zulf-e-kaj-ada se

Tuk munh tera jo paen uljhen abhi hawa se

tum ne nikalne mein kuchh kam na kin jafaen

ab tak jo tham rahe hain hum apni hi wafa se

pahli nigah mein dil par barchhi si lag gai hai

pahunche the intiha ko hum us ki ibtida se

rakhna qadam zamin par Tuk dekh kar pyare

dil rah mein paDe hain lakhon ke naqsh-e-pa se

ja ai tabib yan se itna nahin samajhta

bimari-e-mohabbat kis ki gai dawa se

main aashiq-e-bala hun karta hun us ko sajda

KHak-e-qadam ko us ki jo aao karbala se

mashhur thi buzurgi un ki sabhon se lekin

apne tain taaruf chandan na tha ziya se

aksar gali se us ki dekha tha main ne jate

ho gae the is sabab se kuchh surat-ashna se

kal un ko main ne dekha sar nange pa-barahna

jama jo hai gali mein sau TukDe ja-ba-ja se

dar-parda yun main un se puchha ki qibla-e-man

kyun aaj is qadar hain aazurda-o-KHafa se

mahjub se wo ho kar kahne lage na puchho

mar jaen ya ilahi chhuTen kahin bala se

ye turfa majra hai ek ja pe dil diya hai

par qahr hain wahan ke launDe zara zara se

itni si umr mein ye ayyariyan hain karte

lete hain dil ko pahle de de bahut dilase

jab dekhte hain aaya ab iKHtiyar mein dil

jo dekhiyo to phir pesh aate hain is ada se

main ne kaha ki hazrat aap apni tarf dekhen

jo in buton se hoga so hoga wo KHuda se

be-iKHtiyar ho kar bole ki sach hai sahab

waqif nahin hue ho ishq-e-hawas-faza se

dariya ke rahne wale kya jaanen is asar ko

pani ki qadr puchho un se jo hain piyase