main hun mariz-e-ishq koi chaaragar nahin

maiñ huuñ marīz-e-ishq koī chārāgar nahīñ

maiñ chāhtā huuñ kyā ye kisī ko ḳhabar nahīñ

jis rāste pe chaltā huuñ vo mo'atabar nahīñ

jaatā huuñ kis taraf ko mujhe ḳhud ḳhabar nahīñ

kitne haiñ jo haiñ fikr meñ uqbā ke ġhota-zan

fikr-e-ma.āsh se to kisī ko mafar nahīñ

hālāt mere dekh ke kyoñ tum ho ġham-zada

surḳhī jo aañkh meñ hai vo ḳhūn-e-jigar nahīñ

jis se bhī chāhī maiñ ne madad ġhair ho gayā

is daur meñ to qadr-e-matā.a-e-hunar nahīñ

furqat meñ un kī dil to mirā soḳhta hī thā

āñkheñ bhī ḳhushk ho ga.iiñ ab chashm tar nahīñ

mere alāva ġhair se har dam haiñ ham-kalām

kaise yaqīn kar luuñ ki vo saudāgar nahīñ

daulat thī apne paas to sab log saath the

tanhā hai 'mahshar' aaj koī ham-safar nahīñ

main hun mariz-e-ishq koi chaaragar nahin

main chahta hun kya ye kisi ko KHabar nahin

jis raste pe chalta hun wo mo'atabar nahin

jata hun kis taraf ko mujhe KHud KHabar nahin

kitne hain jo hain fikr mein uqba ke ghota-zan

fikr-e-maash se to kisi ko mafar nahin

haalat mere dekh ke kyon tum ho gham-zada

surKHi jo aankh mein hai wo KHun-e-jigar nahin

jis se bhi chahi main ne madad ghair ho gaya

is daur mein to qadr-e-mataa-e-hunar nahin

furqat mein un ki dil to mera soKHta hi tha

aankhen bhi KHushk ho gain ab chashm tar nahin

mere alawa ghair se har dam hain ham-kalam

kaise yaqin kar lun ki wo saudagar nahin

daulat thi apne pas to sab log sath the

tanha hai 'mahshar' aaj koi ham-safar nahin