main hun na-murad wafa-e-gham na to main nasib-e-bahaar hun

maiñ huuñ nā-murād vafā-e-ġham na to maiñ nasīb-e-bahār huuñ

jo na khil sake vahī gul huuñ maiñ ki chaman kā maiñ vo figār huuñ

mire ġham kī rāhoñ se na mirā kabhī hasratoñ kā sirā milā

maiñ mohabbatoñ kī galī meñ gum huā justujū kā ġhubār huuñ

mere dil se guzrī jo aaj tak vo havā thī terī talāsh meñ

tujhe dekh kar jo bikhar gayā maiñ vo TuuTe dil kā qarār huuñ

merī aañkh se jo Tapak ga.e vo the motī terī hī yaad ke

jo chhupā ke bhī na chhupā sakā vo tire sitam kā shumār huuñ

tujhe pā ke bhī tujhe kho diyā maiñ ne ḳhud ko hī yuuñ gañvā diyā

mujhe naaz hai mere dil ke apnī vafā kā maiñ hī ḳhumār huuñ

terī talḳh bātoñ se juḌ gayā 'sabā' naam merā bhī is tarah

ki abhī abhī kisī ġhair se sunā aib kā maiñ dayār huuñ

main hun na-murad wafa-e-gham na to main nasib-e-bahaar hun

jo na khil sake wahi gul hun main ki chaman ka main wo figar hun

mere gham ki rahon se na mera kabhi hasraton ka sira mila

main mohabbaton ki gali mein gum hua justuju ka ghubar hun

mere dil se guzri jo aaj tak wo hawa thi teri talash mein

tujhe dekh kar jo bikhar gaya main wo TuTe dil ka qarar hun

meri aankh se jo Tapak gae wo the moti teri hi yaad ke

jo chhupa ke bhi na chhupa saka wo tere sitam ka shumar hun

tujhe pa ke bhi tujhe kho diya main ne KHud ko hi yun ganwa diya

mujhe naz hai mere dil ke apni wafa ka main hi KHumar hun

teri talKH baaton se juD gaya 'saba' nam mera bhi is tarah

ki abhi abhi kisi ghair se suna aib ka main dayar hun