main hun tere liye benam-o-nishan aawara

maiñ huuñ tere liye benām-o-nishāñ āvāra

zindagī mere liye tū hai kahāñ āvāra

tujh se kaT kar koī dekhe to kahāñ pahuñchā huuñ

jaise naddī meñ koī sañg-e-ravāñ āvāra

tujh ko dekhā hai kahīñ tujh ko kahāñ dekhā hai

vahm hai sar-ba-garebāñ o gumāñ āvāra

dair-o-ka.aba kī rivāyāt se inkār nahīñ

aao do din to phireñ na.ara-zanāñ āvāra

tere dāman kī tarah dāman-e-shab raḳhshanda

mere ashkoñ kī tarah kaun-o-makāñ āvāra

jalte-bujhte haiñ har ik gaam pe tābinda nujūm

koī hai aaj sar-e-kāhkashāñ āvāra

bhīgī rātoñ meñ 'zafar' phirtā hai tanhā tanhā

aah vo soḳhta-dil soḳhta-jāñ āvāra

main hun tere liye benam-o-nishan aawara

zindagi mere liye tu hai kahan aawara

tujh se kaT kar koi dekhe to kahan pahuncha hun

jaise naddi mein koi sang-e-rawan aawara

tujh ko dekha hai kahin tujh ko kahan dekha hai

wahm hai sar-ba-gareban o guman aawara

dair-o-kaba ki riwayat se inkar nahin

aao do din to phiren nara-zanan aawara

tere daman ki tarah daman-e-shab raKHshanda

mere ashkon ki tarah kaun-o-makan aawara

jalte-bujhte hain har ek gam pe tabinda nujum

koi hai aaj sar-e-kahkashan aawara

bhigi raaton mein 'zafar' phirta hai tanha tanha

aah wo soKHta-dil soKHta-jaan aawara