main ek bahta dariya hun

maiñ ik bahtā dariyā huuñ

lekin kitnā pyāsā huuñ

raah meñ gum-sum baiThā huuñ

ik ik kā muñh taktā huuñ

tujh ko apnā kahtā huuñ

kitnā bholā-bhālā huuñ

dhuup meñ taptā sahrā huuñ

janam janam kā pyāsā huuñ

phir tujh tak lauT aayā huuñ

shāyad khoTā sikka huuñ

aksar tere baare meñ

sapne dekhā kartā huuñ

tū bhī ek khilaunā hai

maiñ bhī ek khilaunā huuñ

merī fitrat chāñd sī hai

ghaTtā baḌhtā rahtā huuñ

bachchoñ kī farmā.ish par

jhūTe va.ade kartā huuñ

yaaro kuchh dam lene do

duur se chal kar aatā huuñ

mustaqbil ke baare meñ

kyā kyā sochā kartā huuñ

'tāhir' ghar kī chaukhaT par

jaane kyoñ chup baiThā huuñ

main ek bahta dariya hun

lekin kitna pyasa hun

rah mein gum-sum baiTha hun

ek ek ka munh takta hun

tujh ko apna kahta hun

kitna bhola-bhaala hun

dhup mein tapta sahra hun

janam janam ka pyasa hun

phir tujh tak lauT aaya hun

shayad khoTa sikka hun

aksar tere bare mein

sapne dekha karta hun

tu bhi ek khilauna hai

main bhi ek khilauna hun

meri fitrat chand si hai

ghaTta baDhta rahta hun

bachchon ki farmaish par

jhuTe wade karta hun

yaro kuchh dam lene do

dur se chal kar aata hun

mustaqbil ke bare mein

kya kya socha karta hun

'tahir' ghar ki chaukhaT par

jaane kyon chup baiTha hun