main ek ik aashna se aashna hun

maiñ ik ik āshnā se āshnā huuñ

ḳhulūs un meñ hai kitnā jāntā huuñ

tirī baat aa.ī thī lab par zarā sī

zamāne bhar kī bāteñ sun rahā huuñ

ye koī jānī-pahchānī jagah hai

achānak chalte chalte ruk gayā huuñ

tamāshā hai ye merī be-ḳhudī kā

maiñ apne aap meñ gum ho gayā huuñ

mirī āñkheñ haiñ goyā un kī āñkheñ

jidhar vo dekhte hoñ dekhtā huuñ

tire ḳhvāboñ kī duniyā sāmne hai

maiñ jhūTī niiñd shāyad so rahā huuñ

tire kūche meñ mela lag rahā hai

maiñ ik vīrān raste par khaḌā huuñ

ye mil kar phir kabhī miltī nahīñ haiñ

tirī nazroñ ko maiñ pahchāntā huuñ

sitam ho yā karam ai 'charḳh' kuchh ho

mohabbat kā maiñ sadqa ban gayā huuñ

main ek ek aashna se aashna hun

KHulus un mein hai kitna jaanta hun

teri baat aai thi lab par zara si

zamane bhar ki baaten sun raha hun

ye koi jaani-pahchani jagah hai

achanak chalte chalte ruk gaya hun

tamasha hai ye meri be-KHudi ka

main apne aap mein gum ho gaya hun

meri aankhen hain goya un ki aankhen

jidhar wo dekhte hon dekhta hun

tere KHwabon ki duniya samne hai

main jhuTi nind shayad so raha hun

tere kuche mein mela lag raha hai

main ek viran raste par khaDa hun

ye mil kar phir kabhi milti nahin hain

teri nazron ko main pahchanta hun

sitam ho ya karam ai 'charKH' kuchh ho

mohabbat ka main sadqa ban gaya hun