میں اس کے سوا اور کیا چاہتا ہوں

میں اس کے سوا اور کیا چاہتا ہوں

تجھے اک نظر دیکھنا چاہتا ہوں

وہ درد محبت ہو یا سوز فرقت

کوئی زیست کا آسرا چاہتا ہوں

ذرا روئے روشن سے پردہ ہٹا دو

نظام دو عالم نیا چاہتا ہوں

بڑا لطف تھا ان کی پہلی نظر میں

محبت کی پھر ابتدا چاہتا ہوں

یہ مقصد نہیں ہے کہ منظور بھی ہو

تجھے ایک سجدہ کیا چاہتا ہوں

ذرا آپ ہٹ جائیے درمیاں سے

میں زور جہاں دیکھنا چاہتا ہوں

سما جا مری آنکھ میں نور بن کر

شب غم کو میں جانچنا چاہتا ہوں

بہارؔ ان کو کیا اپنا مقصد بتاؤں

یہی بات میں جاننا چاہتا ہوں