main is KHayal se sharmindagi mein Dub gaya

maiñ is ḳhayāl se sharmindagī meñ Duub gayā

ki mere hote hue vo nadī meñ Duub gayā

sabhī ko hijr meñ dil to kahīñ lagānā thā

koī sharāb koī shā.erī meñ Duub gayā

nihārtā rahā dariyā vo der tak baiThā

phir us ke baa'd uThā aur usī meñ Duub gayā

jise jahān kī rangīniyāñ Dubo na sakīñ

vo dil kisī kī faqat sādgī meñ Duub gayā

vo hañs rahā thā mire saath phir achānak hī

na jaane kyā huā sanjīdgī meñ Duub gayā

talāsh karte haiñ tahzīb is sadī meñ aap

ye āftāb to pichhlī sadī meñ Duub gayā

hai us ke ranj kā kuchh ilm tujh ko ai sūraj

jo ik sitārā tirī raushnī meñ Duub gayā

kisī ne daad na dī der tak to samjhā maiñ

har ek shaḳhs mirī shā.erī meñ Duub gayā

kisī ne ham ko pukārā thā jaan kah ke 'sirāj'

to rom-rom hamārā ḳhushī meñ Duub gayā

main is KHayal se sharmindagi mein Dub gaya

ki mere hote hue wo nadi mein Dub gaya

sabhi ko hijr mein dil to kahin lagana tha

koi sharab koi shaeri mein Dub gaya

nihaarta raha dariya wo der tak baiTha

phir us ke ba'd uTha aur usi mein Dub gaya

jise jahan ki ranginiyan Dubo na sakin

wo dil kisi ki faqat sadgi mein Dub gaya

wo hans raha tha mere sath phir achanak hi

na jaane kya hua sanjidgi mein Dub gaya

talash karte hain tahzib is sadi mein aap

ye aaftab to pichhli sadi mein Dub gaya

hai us ke ranj ka kuchh ilm tujh ko ai suraj

jo ek sitara teri raushni mein Dub gaya

kisi ne dad na di der tak to samjha main

har ek shaKHs meri shaeri mein Dub gaya

kisi ne hum ko pukara tha jaan kah ke 'siraj'

to rom-rom hamara KHushi mein Dub gaya