main is se pahle ki bikhrun idhar udhar ho jaun

maiñ is se pahle ki bikhrūñ idhar udhar ho jā.ūñ

mujhe sambhāl le mumkin hai dar-ba-dar ho jā.ūñ

ye āb-o-tāb jo mujh meñ hai sab usī se hai

agar vo chhoḌ de mujh ko to maiñ khañDar ho jā.ūñ

mirī madad se khujūroñ kī fasl pakne lage

maiñ chāhtā huuñ ki sahrā kī dopahar ho jā.ūñ

maiñ ās-pās ke mausam se huuñ tar-o-tāza

maiñ apne jhunD se niklūñ to be-samar ho jā.ūñ

baḌī ajiib sī hiddat hai us kī yādoñ meñ

agar maiñ chhū luuñ pasīne se tar-ba-tar ho jā.ūñ

maiñ kachchī miTTī kī sūrat huuñ tere hāthoñ meñ

mujhe tū Dhaal de aise ki mo'atabar ho jā.ūñ

bachī-khuchī huī sāñsoñ ke saath pahuñchānā

suno havāo agar maiñ shikasta-par ho jā.ūñ

main is se pahle ki bikhrun idhar udhar ho jaun

mujhe sambhaal le mumkin hai dar-ba-dar ho jaun

ye aab-o-tab jo mujh mein hai sab usi se hai

agar wo chhoD de mujh ko to main khanDar ho jaun

meri madad se khujuron ki fasl pakne lage

main chahta hun ki sahra ki dopahar ho jaun

main aas-pas ke mausam se hun tar-o-taza

main apne jhunD se niklun to be-samar ho jaun

baDi ajib si hiddat hai us ki yaadon mein

agar main chhu lun pasine se tar-ba-tar ho jaun

main kachchi miTTi ki surat hun tere hathon mein

mujhe tu Dhaal de aise ki mo'atabar ho jaun

bachi-khuchi hui sanson ke sath pahunchana

suno hawao agar main shikasta-par ho jaun