میں جبر شوق میں کیا کاغذوں پہ لکھتا رہا

میں جبر شوق میں کیا کاغذوں پہ لکھتا رہا

تری گلی کی ہوا کاغذوں پہ لکھتا رہا

ترے جمال کی کرنیں ترے خیال کی لو

میں روشنی کا پتہ کاغذوں پہ لکھتا رہا

حصول رزق بھی لازم تھا اور محبت بھی

میں نان شب کا گدا کاغذوں پہ لکھتا رہا

ردائے عشق جسے بھی عطا ہوئی تجھ سے

فقیر بن کے ترا کاغذوں پہ لکھتا رہا

ترے فراق کا سورج مجھے جلاتا رہا

میں شعر کہتا رہا کاغذوں پہ لکھتا رہا

مرے لبوں سے کبھی آہ تک نہیں نکلی

بس اپنا کرب و بلا کاغذوں پہ لکھتا رہا

شعور ذات کا عرفان پا لیا جس نے

وہ مثل شمع جلا کاغذوں پہ لکھتا رہا

نہ جانے کتنی دعائیں ہی میں نے مانگیں اور

جو مانگنی تھی دعا کاغذوں پہ لکھتا رہا

یہی زمانہ مجھے کل کہے گا شاعر سا

نہ جانے کون تھا کیا کاغذوں پہ لکھتا رہا

تمام رات ہی آنکھوں میں کٹ گئی طارقؔ

میں اپنی ماں کی دعا کاغذوں پہ لکھتا رہا