main jabr-e-shauq mein kya kaghazon pe likhta raha

maiñ jabr-e-shauq meñ kyā kāġhazoñ pe likhtā rahā

tirī galī kī havā kāġhazoñ pe likhtā rahā

tire jamāl kī kirneñ tire ḳhayāl kī lau

maiñ raushnī kā pata kāġhazoñ pe likhtā rahā

husūl-e-rizq bhī lāzim thā aur mohabbat bhī

maiñ nān-e-shab kā gadā kāġhazoñ pe likhtā rahā

ridā-e-ishq jise bhī atā huī tujh se

faqīr ban ke tirā kāġhazoñ pe likhtā rahā

tire firāq kā sūraj mujhe jalātā rahā

maiñ sher kahtā rahā kāġhazoñ pe likhtā rahā

mire laboñ se kabhī aah tak nahīñ niklī

bas apnā karb-o-balā kāġhazoñ pe likhtā rahā

shu.ūr-e-zāt kā irfān pā liyā jis ne

vo misl-e-sham.a jalā kāġhazoñ pe likhtā rahā

na jaane kitnī duā.eñ hī maiñ ne māñgīñ aur

jo māñgnī thī duā kāġhazoñ pe likhtā rahā

yahī zamāna mujhe kal kahegā shā.ir sā

na jaane kaun thā kyā kāġhazoñ pe likhtā rahā

tamām raat hī āñkhoñ meñ kaT ga.ī 'tāriq'

maiñ apnī maañ kī duā kāġhazoñ pe likhtā rahā

main jabr-e-shauq mein kya kaghazon pe likhta raha

teri gali ki hawa kaghazon pe likhta raha

tere jamal ki kirnen tere KHayal ki lau

main raushni ka pata kaghazon pe likhta raha

husul-e-rizq bhi lazim tha aur mohabbat bhi

main nan-e-shab ka gada kaghazon pe likhta raha

rida-e-ishq jise bhi ata hui tujh se

faqir ban ke tera kaghazon pe likhta raha

tere firaq ka suraj mujhe jalata raha

main sher kahta raha kaghazon pe likhta raha

mere labon se kabhi aah tak nahin nikli

bas apna karb-o-bala kaghazon pe likhta raha

shuur-e-zat ka irfan pa liya jis ne

wo misl-e-shama jala kaghazon pe likhta raha

na jaane kitni duaen hi main ne mangin aur

jo mangni thi dua kaghazon pe likhta raha

yahi zamana mujhe kal kahega shair sa

na jaane kaun tha kya kaghazon pe likhta raha

tamam raat hi aankhon mein kaT gai 'tariq'

main apni man ki dua kaghazon pe likhta raha