main jahan bhi hun wahin anjuman-arai hai

maiñ jahāñ bhī huuñ vahīñ anjuman-ārā.ī hai

ki mire saath mirā ālam-e-tanhā.ī hai

hasrat-e-āh bhī tauhīn-e-shakebā.ī hai

kyā mire dard kā mafhūm hī rusvā.ī hai

na tajallī na koī anjuman-ārā.ī hai

zindagī ek musalsal shab-e-tanhā.ī hai

maut hai qīmat-e-hastī koī in.aam nahīñ

jaan dī hai to hayāt-e-abadī paa.ī hai

DhūñDhte phirte haiñ yuuñ qāfile vaale mujh ko

jaise manzil mire hamrāh chalī aa.ī hai

sīna-e-gul meñ jo tūfāñ hai hameñ kyā mālūm

ham to itnā hī samajhte haiñ bahār aa.ī hai

rāz-e-nairang-e-chaman koī na samjhā 'shāhid'

maut phūloñ kī ba-unvān-e-bahār aa.ī he

main jahan bhi hun wahin anjuman-arai hai

ki mere sath mera aalam-e-tanhai hai

hasrat-e-ah bhi tauhin-e-shakebai hai

kya mere dard ka mafhum hi ruswai hai

na tajalli na koi anjuman-arai hai

zindagi ek musalsal shab-e-tanhai hai

maut hai qimat-e-hasti koi inam nahin

jaan di hai to hayat-e-abadi pai hai

DhunDhte phirte hain yun qafile wale mujh ko

jaise manzil mere hamrah chali aai hai

sina-e-gul mein jo tufan hai hamein kya malum

hum to itna hi samajhte hain bahaar aai hai

raaz-e-nairang-e-chaman koi na samjha 'shahid'

maut phulon ki ba-unwan-e-bahaar aai he