میں جواب ان کو کیا دوں جو سوال پوچھتے ہیں

میں جواب ان کو کیا دوں جو سوال پوچھتے ہیں

مجھے کر کے خود پریشاں مرا حال پوچھتے ہیں

کوئی ایسا سر پھرا ہے کوئی ایسا مبتلا ہے

مری عاشقی کی دے کر وہ مثال پوچھتے ہیں

کسی اک سوال کا بھی نہ جواب دے سکیں گے

سر بزم ہر کسی سے جو سوال پوچھتے ہیں

ترا ذوق عاشقانہ ہوا کب جواں بتانا

وہ بصد نیاز مندی سن و سال پوچھتے ہیں

نہیں سب کے پوچھنے کی کوئی بات اس میں حسرتؔ

جو رفیق ہیں وہ اکثر مرا حال پوچھتے ہیں