main ji raha hun tera sahaara liye baghair

maiñ jī rahā huuñ terā sahārā liye baġhair

ye zahr pī rahā huuñ gavārā kiye baġhair

biktā na kaash ishq kī qīmat liye baġhair

maiñ un kā ho gayā unheñ apnā kiye baġhair

vāqif to huuñ vafā ke natīje se ham-nashīñ

bantī nahīñ hai un pe bharosā kiye baġhair

kyā zindagī hai ahl-e-gulistāñ kī zindagī

gul hañs rahe haiñ chāk-e-garebāñ siye baġhair

din-rāt ham ne ġham kī hifāzat to kī magar

duniyā na rah sakī hameñ rusvā kiye baġhair

marne kī aarzū mujhe muddat se hai magar

lekin ye kaam ho nahīñ saktā jiye baġhair

un kī nigāh-e-mast ke sadqe meñ muddatoñ

ik be-ḳhudī kā daur rahā hai piye baġhair

barq-e-chaman hudūd-e-chaman se nikal ke dekh

tārīk ek aur bhī ghar hai diye baġhair

ai 'raaj raas aa na sakī mahfil-e-hayāt

ham aa ga.e the kis kī ijāzat liye baġhair

main ji raha hun tera sahaara liye baghair

ye zahr pi raha hun gawara kiye baghair

bikta na kash ishq ki qimat liye baghair

main un ka ho gaya unhen apna kiye baghair

waqif to hun wafa ke natije se ham-nashin

banti nahin hai un pe bharosa kiye baghair

kya zindagi hai ahl-e-gulistan ki zindagi

gul hans rahe hain chaak-e-gareban siye baghair

din-raat hum ne gham ki hifazat to ki magar

duniya na rah saki hamein ruswa kiye baghair

marne ki aarzu mujhe muddat se hai magar

lekin ye kaam ho nahin sakta jiye baghair

un ki nigah-e-mast ke sadqe mein muddaton

ek be-KHudi ka daur raha hai piye baghair

barq-e-chaman hudud-e-chaman se nikal ke dekh

tarik ek aur bhi ghar hai diye baghair

ai 'raj ras aa na saki mahfil-e-hayat

hum aa gae the kis ki ijazat liye baghair