main jin bulandiyon pe tha jin se gira bhi tha

maiñ jin bulandiyoñ pe thā jin se girā bhī thā

merā ḳhayāl hai ki vahāñ par ḳhudā bhī thā

utrā zamīn par to nigāheñ chamak uThīñ

ye husn garche ḳhuld se kam thā judā bhī thā

us ne zamīn par bhī na jiine diyā mujhe

ye sheva-e-sazā ki ḳhudā ko ravā bhī thā

pesh-e-nazar thā hazrat-e-ādam ke jo shajar

thī lazzat-e-samar to ḳhayāl-e-baqā bhī thā

shāyad ki sochtā bhī ho mere liye vo husn

mujh ko nikāl kar jo mujhe dekhtā bhī thā

kyuuñ us ne arsh-o-farsh pe apnā liyā mujhe

kyā tujh sā do-jahāñ meñ koī dūsrā bhī thā

'ārif' vo kar rahā thā tabassum bhī zer-e-lab

jab ālam-e-itāb meñ mujh se ḳhafā bhī thā

main jin bulandiyon pe tha jin se gira bhi tha

mera KHayal hai ki wahan par KHuda bhi tha

utra zamin par to nigahen chamak uThin

ye husn garche KHuld se kam tha juda bhi tha

us ne zamin par bhi na jine diya mujhe

ye shewa-e-saza ki KHuda ko rawa bhi tha

pesh-e-nazar tha hazrat-e-adam ke jo shajar

thi lazzat-e-samar to KHayal-e-baqa bhi tha

shayad ki sochta bhi ho mere liye wo husn

mujh ko nikal kar jo mujhe dekhta bhi tha

kyun us ne arsh-o-farsh pe apna liya mujhe

kya tujh sa do-jahan mein koi dusra bhi tha

'arif' wo kar raha tha tabassum bhi zer-e-lab

jab aalam-e-itab mein mujh se KHafa bhi tha