main jis din se akeli ho gai hun

maiñ jis din se akelī ho ga.ī huuñ

maiñ kaisī thī maiñ kaisī ho ga.ī huuñ

nahīñ kuchh yaad rahtā haiñ mujhe ab

bichhaḌ kar tum se paglī ho ga.ī huuñ

tasavvur ne tire mujh ko chhuā phir

achānak se maiñ achchhī ho ga.ī huuñ

tirā ġham mujh ko raas aane lagā hai

bikhar kar phir ikaTThī ho ga.ī huuñ

pareshānī ye mujh se hañs ke bolī

tire ghar kī maiñ bachchī ho ga.ī huuñ

jo merā ho ke merā ho na paayā

na ho kar bhī usī kī ho ga.ī huuñ

mujhe phir lauT ke jaanā hai us tak

jo merā thā usī kī ho ga.ī huuñ

jise dekho vo hī kahtā hai mujh se

sarāpā ik udāsī ho ga.ī huuñ

'siyā' kuchh din se bojhal hai bahut dil

maiñ ro ro kar ke halkī ho ga.ī huuñ

main jis din se akeli ho gai hun

main kaisi thi main kaisi ho gai hun

nahin kuchh yaad rahta hain mujhe ab

bichhaD kar tum se pagli ho gai hun

tasawwur ne tere mujh ko chhua phir

achanak se main achchhi ho gai hun

tera gham mujh ko ras aane laga hai

bikhar kar phir ikaTThi ho gai hun

pareshani ye mujh se hans ke boli

tere ghar ki main bachchi ho gai hun

jo mera ho ke mera ho na paya

na ho kar bhi usi ki ho gai hun

mujhe phir lauT ke jaana hai us tak

jo mera tha usi ki ho gai hun

jise dekho wo hi kahta hai mujh se

sarapa ek udasi ho gai hun

'siya' kuchh din se bojhal hai bahut dil

main ro ro kar ke halki ho gai hun