میں جسے دشت سمجھتا رہا گھر نکلا ہے

میں جسے دشت سمجھتا رہا گھر نکلا ہے

کیا عجب میری دعاؤں سے اثر نکلا ہے

دل کی تاریکی سے اک نالہ خدا کی جانب

جانتا ہے نہیں پہنچے گا مگر نکلا ہے

اک پرندہ کئی دن سے نہیں لوٹا تو اسے

ڈھونڈھنے باغ سے اک بوڑھا شجر نکلا ہے

اس کو معلوم نہیں آسماں والوں کے فریب

فال میں اس کے غلط سمت سفر نکلا ہے

دوسری بار لیے جاتا ہے دل جانب عشق

یار مشکل سے ابھی پہلے کا ڈر نکلا ہے

یوں اٹھائی ہے نظر یار نے میری جانب

مانو کشتی کے تعاقب میں بھنور نکلا ہے