main jo bad-hawas tha mahw-e-qayas tum bhi the

maiñ jo bad-havās thā mahv-e-qayās tum bhī the

bichhaḌte vaqt zarā sā udaas tum bhī the

badalte vaqt kā manzar thā sab kī āñkhoñ meñ

misāl maiñ thā agar iqtibās tum bhī the

mujhe to daar milā tum ko kaise taḳht milā

sunā hai merī tarah haq-shanās tum bhī the

tumhāre hoñT se ḳhushiyāñ chhalak ga.iiñ kaise

uThā.e haath meñ ḳhālī gilās tum bhī the

akelā-pan pe ka.ī sher kah diye maiñ ne

ye aur baat mire aas paas tum bhī the

main jo bad-hawas tha mahw-e-qayas tum bhi the

bichhaDte waqt zara sa udas tum bhi the

badalte waqt ka manzar tha sab ki aankhon mein

misal main tha agar iqtibas tum bhi the

mujhe to dar mila tum ko kaise taKHt mila

suna hai meri tarah haq-shanas tum bhi the

tumhaare honT se KHushiyan chhalak gain kaise

uThae hath mein KHali gilas tum bhi the

akela-pan pe kai sher kah diye main ne

ye aur baat mere aas pas tum bhi the