میں کہاں ہوں کہ مرا جسم تو سایہ ہے مرا

میں کہاں ہوں کہ مرا جسم تو سایہ ہے مرا

یہ حقیقت ہے کہ ہر خواب پرایا ہے مرا

روبرو آئنے میں عکس وہ اپنا ہی سہی

خوش ہوا ہوں کہ مرے گھر کوئی آیا ہے مرا

تو مرے عشق سے انکار کرے گا کیسے

خال و خد میں ترے چہرہ ابھر آیا ہے مرا

کیوں مجھے بند کیا ہے سر تہہ خانۂ زیست

کچھ تو معلوم ہو کیا جرم خدایا ہے مرا

آگ پھیلی ہے کہاں سے مرے چاروں جانب

کس نے اے موج ہوا شہر جلایا ہے مرا

سانس لینے کی جو کوشش کبھی کی ہے طارقؔ

مضحکہ خوب ہواؤں نے اڑایا ہے مرا