main kal likhunga phir ek kahani abhi kahani miTa raha hun

maiñ kal likhūñgā phir ik kahānī abhī kahānī miTā rahā huuñ

laboñ pe bose kī jo namī hai vo rakh ke unglī miTā rahā huuñ

mujhe banānī hai ek mūrat ho ḳhvāb-paikar ḳhayāl-sūrat

bahut ziyāda lagegī miTTī so apnī hastī miTā rahā huuñ

maiñ chīḳhtā huuñ maiñ bhāgtā huuñ kyoñ chīḳhtā huuñ kyoñ bhāgtā huuñ

yahāñ kī galiyoñ meñ maiñ ne likkhī thī jo ḳhamoshī miTā rahā huuñ

maiñ ek TuuTā huā sitārā jo kahkashāñ meñ phirūñ huuñ maarā

nasīb likkhūñgā kyā tumhārā maiñ to mujhe hī miTā rahā huuñ

ye daur-o-duniyā ġhalat pata hai jahāñ maiñ ġhalatī se aa gayā huuñ

kabhī kisī se na ho ye ġhalatī so ye pata hī miTā rahā huuñ

miTāne kī lat lagī hai mujh ko ye lat miTāne lagī hai mujh ko

jo miT chukā hai jo khap chukā hai use maiñ ab bhī miTā rahā huuñ

main kal likhunga phir ek kahani abhi kahani miTa raha hun

labon pe bose ki jo nami hai wo rakh ke ungli miTa raha hun

mujhe banani hai ek murat ho KHwab-paikar KHayal-surat

bahut ziyaada lagegi miTTi so apni hasti miTa raha hun

main chiKHta hun main bhagta hun kyon chiKHta hun kyon bhagta hun

yahan ki galiyon mein main ne likkhi thi jo KHamoshi miTa raha hun

main ek TuTa hua sitara jo kahkashan mein phirun hun mara

nasib likkhunga kya tumhaara main to mujhe hi miTa raha hun

ye daur-o-duniya ghalat pata hai jahan main ghalati se aa gaya hun

kabhi kisi se na ho ye ghalati so ye pata hi miTa raha hun

miTane ki lat lagi hai mujh ko ye lat miTane lagi hai mujh ko

jo miT chuka hai jo khap chuka hai use main ab bhi miTa raha hun