main kar lun sajda ye jazb-e-asar mile na mile

maiñ kar luuñ sajda ye jazb-e-asar mile na mile

asar mile to tirā sang-e-dar mile na mile

hamāre TuuTe diloñ ko bhī joḌiye sāhib

phir aap sā koī ā.īna-gar mile na mile

safar hī bāñdh liyā paañv meñ to Darnā kyā

sulagtī dhuup meñ koī shajar mile na mile

ḳhudā kare ki mirī us kī ek ho manzil

phir us ke jaisā koī ham-safar mile na mile

nigāh bhar ke dar-o-bām dekh lene do

palaT ke aa.uuñ to phir merā ghar mile na mile

lagā diye haiñ shajar ye ḳhushī hī kyā kam hai

ab in daraḳhtoñ kā mujh ko samar mile na mile

unheñ ḳhabar hai mirī ek ek dhaḌkan kī

balā se mujh ko koī nāma-bar mile na mile

nazar milā ke vo ik baar kah ga.e sab kuchh

dobāra ab mirī un se nazar mile na mile

hamārā dil hī hamārā hai rāhbar 'fārūq'

ab aur koī hameñ rāhbar mile na mile

main kar lun sajda ye jazb-e-asar mile na mile

asar mile to tera sang-e-dar mile na mile

hamare TuTe dilon ko bhi joDiye sahib

phir aap sa koi aaina-gar mile na mile

safar hi bandh liya panw mein to Darna kya

sulagti dhup mein koi shajar mile na mile

KHuda kare ki meri us ki ek ho manzil

phir us ke jaisa koi ham-safar mile na mile

nigah bhar ke dar-o-baam dekh lene do

palaT ke aaun to phir mera ghar mile na mile

laga diye hain shajar ye KHushi hi kya kam hai

ab in daraKHton ka mujh ko samar mile na mile

unhen KHabar hai meri ek ek dhaDkan ki

bala se mujh ko koi nama-bar mile na mile

nazar mila ke wo ek bar kah gae sab kuchh

dobara ab meri un se nazar mile na mile

hamara dil hi hamara hai rahbar 'faruq'

ab aur koi hamein rahbar mile na mile