main karb-e-but-tarashi-e-azar mein qaid tha

maiñ karb-e-but-tarāshī-e-āzar meñ qaid thā

sho.ale kā kyā qusūr jo patthar meñ qaid thā

jis kī tahoñ meñ ḳhud hī machaltī haiñ āñdhiyāñ

maiñ ḳhvāhishoñ ke aise samundar meñ qaid thā

pheñke hai mujh ko duur ye gardish hai kitnī tez

kin mushkiloñ se zaat ke mehvar meñ qaid thā

aate haiñ saare rāste muḌ kar yahīñ 'shakīl'

zindāñ mirā yahī thā isī ghar meñ qaid thā

jis kā tarīq-e-jañg hī shab-ḳhūñ rahā 'shakīl'

maiñ aise hādsāt ke lashkar meñ qaid thā

main karb-e-but-tarashi-e-azar mein qaid tha

shoale ka kya qusur jo patthar mein qaid tha

jis ki tahon mein KHud hi machalti hain aandhiyan

main KHwahishon ke aise samundar mein qaid tha

phenke hai mujh ko dur ye gardish hai kitni tez

kin mushkilon se zat ke mehwar mein qaid tha

aate hain sare raste muD kar yahin 'shakil'

zindan mera yahi tha isi ghar mein qaid tha

jis ka tariq-e-jang hi shab-KHun raha 'shakil'

main aise hadsat ke lashkar mein qaid tha