main kho chuka hun ajab raste banate hue

maiñ kho chukā huuñ ajab rāste banāte hue

talāsh kartā huuñ ab zā.iche banāte hue

ḳhud apnī raah kī dīvār kar diyā ḳhud ko

mohabbatoñ meñ na.e zāviye banāte hue

bichhā ke jhiil taḳhayyul ke ek sahrā meñ

tujhe bhulā.ūñgā maiñ dā.ere banāte hue

nikal chukā huuñ maiñ apnī hudūd se aage

na.ī radīf na.e qāfiye banāte hue

ye hādisa bhī mujhe pesh aa gayā afsos

ki aa.ina sā huā aa.ine banāte hue

nigal chukā huuñ hazāroñ hī jaam talḳhī ke

surūr-e-jāñ ke liye zā.iqe banāte hue

zamīñ se ubhrā to phir āsmāñ ne kuchlā mujhe

kahīñ kā maiñ na rahā martabe banāte hue

ḳhud apne paañv kī zanjīr ban gayā maiñ to

diloñ ke beach na.e silsile banāte hue

palaT ke dekhā nahīñ maiñ ne zindagī kī taraf

maiñ dauḌtā rahā bas ham ko the banāte hue

milī haiñ mauj-e-'nasīmī' kī qurbateñ mujh ko

aqīdatoñ ke na.e zābte banāte hue

main kho chuka hun ajab raste banate hue

talash karta hun ab zaiche banate hue

KHud apni rah ki diwar kar diya KHud ko

mohabbaton mein nae zawiye banate hue

bichha ke jhil taKHayyul ke ek sahra mein

tujhe bhulaunga main daere banate hue

nikal chuka hun main apni hudud se aage

nai radif nae qafiye banate hue

ye hadisa bhi mujhe pesh aa gaya afsos

ki aaina sa hua aaine banate hue

nigal chuka hun hazaron hi jam talKHi ke

surur-e-jaan ke liye zaiqe banate hue

zamin se ubhra to phir aasman ne kuchla mujhe

kahin ka main na raha martabe banate hue

KHud apne panw ki zanjir ban gaya main to

dilon ke beach nae silsile banate hue

palaT ke dekha nahin main ne zindagi ki taraf

main dauDta raha bas hum ko the banate hue

mili hain mauj-e-'nasimi' ki qurbaten mujh ko

aqidaton ke nae zabte banate hue