main kho chuka hun apni mohabbat ka eatibar

maiñ kho chukā huuñ apnī mohabbat kā e.atibār

dekhe vo apnī aañkh se hai is kā intizār

har aa.ine pe chhāyā hai dūd-e-ravāñ kā aks

dekhūñ kahāñ maiñ apne ḳhayāloñ kā sabza-zār

le ke uḌā hai shāḳh se pattoñ kī Toliyāñ

yuuñ gungunā rahā hai havāoñ kā ābshār

kyoñ de rahā hai sheroñ meñ lafzoñ se ik fareb

jo dil kā sach hai us ko bhī ik baar tū pukār

dekhā nahīñ hai āñkhoñ se mahsūs to kiyā

karnā paḌā yuuñ us ke bhī hone kā e.atibār

jo har fareb-e-zīst ke jismoñ ko Dhak gayā

us zar-nigār ḳhvāb ke kapḌe na tū utaar

ham ātish-e-fareb se jal kar hue haiñ raakh

rakh de hamārī ḳhaak meñ chāhat kā ik sharār

bahrūp terā ā.ina-e-dil meñ aa basā

ab ruup mere sāmne koī na aur dhaar

main kho chuka hun apni mohabbat ka eatibar

dekhe wo apni aankh se hai is ka intizar

har aaine pe chhaya hai dud-e-rawan ka aks

dekhun kahan main apne KHayalon ka sabza-zar

le ke uDa hai shaKH se patton ki Toliyan

yun gunguna raha hai hawaon ka aabshaar

kyon de raha hai sheron mein lafzon se ek fareb

jo dil ka sach hai us ko bhi ek bar tu pukar

dekha nahin hai aankhon se mahsus to kiya

karna paDa yun us ke bhi hone ka eatibar

jo har fareb-e-zist ke jismon ko Dhak gaya

us zar-nigar KHwab ke kapDe na tu utar

hum aatish-e-fareb se jal kar hue hain rakh

rakh de hamari KHak mein chahat ka ek sharar

bahrup tera aaina-e-dil mein aa basa

ab rup mere samne koi na aur dhaar