میں کھو چکا ہوں اپنی محبت کا اعتبار

میں کھو چکا ہوں اپنی محبت کا اعتبار

دیکھے وہ اپنی آنکھ سے ہے اس کا انتظار

ہر آئنہ پہ چھایا ہے دود رواں کا عکس

دیکھوں کہاں میں اپنے خیالوں کا سبزہ زار

لے کے اڑا ہے شاخ سے پتوں کی ٹولیاں

یوں گنگنا رہا ہے ہواؤں کا آبشار

کیوں دے رہا ہے شعروں میں لفظوں سے اک فریب

جو دل کا سچ ہے اس کو بھی اک بار تو پکار

دیکھا نہیں ہے آنکھوں سے محسوس تو کیا

کرنا پڑا یوں اس کے بھی ہونے کا اعتبار

جو ہر فریب زیست کے جسموں کو ڈھک گیا

اس زر نگار خواب کے کپڑے نہ تو اتار

ہم آتش فریب سے جل کر ہوئے ہیں راکھ

رکھ دے ہماری خاک میں چاہت کا اک شرار

بہروپ تیرا آئنۂ دل میں آ بسا

اب روپ میرے سامنے کوئی نہ اور دھار