main KHud gaya na uski ada le gai mujhe

maiñ ḳhud gayā na us kī adā le ga.ī mujhe

maqtal meñ rasm-e-pās-e-vafā le ga.ī mujhe

andar se khokhlā jo thā ballōn kī tarah

chāhā jidhar havā ne uḌā le ga.ī mujhe

ik harf thā jo tum ne sunā an-sunā kiyā

ab DhūñDte phiro ki sadā le ga.ī mujhe

sāhil se merā paañv phisalne kī der thī

ik mauj-e-be-panāh bahā le ga.ī mujhe

baiThā thā chhup ke os kī ThanDī phuvār meñ

aa.ī kaḌaktī dhuup uThā le ga.ī mujhe

jaatā kahāñ ki aage koī rāsta na thā

andhī guphā meñ merī anā le ga.ī mujhe

'sābir' maiñ reza reza ḳhalā meñ bikhar gayā

itnī bulandiyoñ pe havā le ga.ī mujhe

main KHud gaya na us ki ada le gai mujhe

maqtal mein rasm-e-pas-e-wafa le gai mujhe

andar se khokhla jo tha balloon ki tarah

chaha jidhar hawa ne uDa le gai mujhe

ek harf tha jo tum ne suna an-suna kiya

ab DhunDte phiro ki sada le gai mujhe

sahil se mera panw phisalne ki der thi

ek mauj-e-be-panah baha le gai mujhe

baiTha tha chhup ke os ki ThanDi phuwar mein

aai kaDakti dhup uTha le gai mujhe

jata kahan ki aage koi rasta na tha

andhi gupha mein meri ana le gai mujhe

'sabir' main reza reza KHala mein bikhar gaya

itni bulandiyon pe hawa le gai mujhe