main KHud hi KHwab-e-ishq ki tabir ho gaya

maiñ ḳhud hī ḳhvāb-e-ishq kī ta.abīr ho gayā

goyā har ik bashar tirī tasvīr ho gayā

apne kiye ko aa ke zarā dekh tīr-gar

tar ḳhūn-e-dil se daman-e-naḳhchīr ho gayā

phir pesh aa gayā vahī dilchasp hādisa

dil phir kisī ke daam meñ tasḳhīr ho gayā

ye vaz-e-āshiqān ye andāz-e-ehtirām

āḳhir mirā ḳhayāl use dil-gīr ho gayā

āsūdgī nasīb salīmuttaba huuñ maiñ

mujh ko ġharīb-ḳhāna hī kashmīr ho gayā

vābasta mujh se honā hai ḳhud vaj.h-e-āfiyat

dīvāna terā vālī-e-taqdīr ho gayā

tafrīd ḳhud zarīya-e-jāh-o-jalāl hai

maiñ terā ho ke sāhab-e-tauqīr ho gayā

to ḳhuub jāntā hai ki maiñ kaun thā kabhī

aur dekh ab ki kyā falak-e-pīr ho gayā

honā thā hashr-e-hasrat-o-hirmāñ agar yahī

'rahbar' zah-e-nasīb ki tū piir ho gayā

main KHud hi KHwab-e-ishq ki tabir ho gaya

goya har ek bashar teri taswir ho gaya

apne kiye ko aa ke zara dekh tir-gar

tar KHun-e-dil se daman-e-naKHchir ho gaya

phir pesh aa gaya wahi dilchasp hadisa

dil phir kisi ke dam mein tasKHir ho gaya

ye waz-e-ashiqan ye andaz-e-ehtiram

aaKHir mera KHayal use dil-gir ho gaya

aasudgi nasib salimuttaba hun main

mujh ko gharib-KHana hi kashmir ho gaya

wabasta mujh se hona hai KHud wajh-e-afiyat

diwana tera wali-e-taqdir ho gaya

tafrid KHud zariya-e-jah-o-jalal hai

main tera ho ke sahab-e-tauqir ho gaya

to KHub jaanta hai ki main kaun tha kabhi

aur dekh ab ki kya falak-e-pir ho gaya

hona tha hashr-e-hasrat-o-hirman agar yahi

'rahbar' zah-e-nasib ki tu pir ho gaya