main KHud hun naqd magar sau udhaar sar par hai

maiñ ḳhud huuñ naqd magar sau udhār sar par hai

ajab vabāl-e-ġham-e-rozgār sar par hai

gumāñ hai sab ko ki huuñ āsmāñ uThā.e hue

safar safar vo qadam kā ġhubār sar par hai

havā-e-jāñ kā taqāzā ki rahiye ghar se duur

ki haiñ jo ghar meñ bayābāñ hazār sar par hai

subuk na samjho mujhe pusht TuuT jā.egī

maiñ ek pal sahī sadiyoñ kā baar sar par hai

zamīñ ke zimme hai jo qarz kyuuñ chukā.ūñ maiñ

zamāna kis liye āḳhir savār sar par hai

hazār ghāTe kā saudā ho ye faqīrī-e-harf

yahī bahut hai kulāh-e-vaqār sar par hai

'fazā' na thā kabhī taaza dimāġh itnā maiñ

hai us kā haath ki shāḳh-e-bahār sar par hai

main KHud hun naqd magar sau udhaar sar par hai

ajab wabaal-e-gham-e-rozgar sar par hai

guman hai sab ko ki hun aasman uThae hue

safar safar wo qadam ka ghubar sar par hai

hawa-e-jaan ka taqaza ki rahiye ghar se dur

ki hain jo ghar mein bayaban hazar sar par hai

subuk na samjho mujhe pusht TuT jaegi

main ek pal sahi sadiyon ka bar sar par hai

zamin ke zimme hai jo qarz kyun chukaun main

zamana kis liye aaKHir sawar sar par hai

hazar ghaTe ka sauda ho ye faqiri-e-harf

yahi bahut hai kulah-e-waqar sar par hai

'faza' na tha kabhi taza dimagh itna main

hai us ka hath ki shaKH-e-bahaar sar par hai