main KHudi mein mubtila KHud ko miTane ke liye

maiñ ḳhudī meñ mubtilā ḳhud ko miTāne ke liye

tū ne to har zarre ko zau dī jagmagāne ke liye

ek adnā se patiñge ne banā dī jaan par

sham.a ne koshish to kī thī dil jalāne ke liye

barq-e-ḳhirman sozāb rakhnā zarā chashm-e-karam

chaar tinke phir jaḌe haiñ āshiyāne ke liye

muñh nahīñ har ek kā jo saḳhti-e-gardūñ sahe

kuchh kaleja chāhiye vo zaḳhm khāne ke liye

ḳhuub bulbul ko sikhāyā nāla-e-mastāna-vār

ḳhuub ġhunche ko samajh dī muskurāne ke liye

is qadar arzāñ huī hai aaj kal jins-e-kamāl

jhūTe sikke Dhal rahe haiñ har ḳhazāne ke liye

ḳhvāb meñ bhī ab nahīñ 'shā.ir' vo garmi-e-kalām

sham.a sī ik rah ga.ī hai jhilmilāne ke liye

main KHudi mein mubtila KHud ko miTane ke liye

tu ne to har zarre ko zau di jagmagane ke liye

ek adna se patinge ne bana di jaan par

shama ne koshish to ki thi dil jalane ke liye

barq-e-KHirman sozab rakhna zara chashm-e-karam

chaar tinke phir jaDe hain aashiyane ke liye

munh nahin har ek ka jo saKHti-e-gardun sahe

kuchh kaleja chahiye wo zaKHm khane ke liye

KHub bulbul ko sikhaya nala-e-mastana-war

KHub ghunche ko samajh di muskurane ke liye

is qadar arzan hui hai aaj kal jins-e-kamal

jhuTe sikke Dhal rahe hain har KHazane ke liye

KHwab mein bhi ab nahin 'shair' wo garmi-e-kalam

shama si ek rah gai hai jhilmilane ke liye