main KHub ahl-e-jahan dekhe aur jahan dekha

maiñ ḳhuub ahl-e-jahāñ dekhe aur jahāñ dekhā

par āshnā koī dekhā na mehrbāñ dekhā

hamesha man.a tū kartā thā baaġh se ham ko

kuchh haal ab gul o gulshan kā bāġhbāñ dekhā

talab kamāl kī koī na kījiyo zinhār

ki maiñ ye kar ke fuzūlī bahut ziyāñ dekhā

na jaane kaun sī saa.at chaman se bichhḌe the

ki aañkh bhar ke na phir sū-e-gulsitāñ dekhā

sune ko dekhe pa ham kis tarah se deñ tarjīh

ḳhudā to ham ne sunā hai tumheñ butāñ dekhā

ba-rañg-e-ġhuncha bahār us chaman kī sunte the

pa juuñ hī aañkh khulī mausam-e-ḳhizāñ dekhā

na kahte the tujhe 'qā.em' ki dil kisī ko na de

mazā kuchh is kā bhalā tū ne ai miyāñ dekhā

main KHub ahl-e-jahan dekhe aur jahan dekha

par aashna koi dekha na mehrban dekha

hamesha mana tu karta tha bagh se hum ko

kuchh haal ab gul o gulshan ka baghban dekha

talab kamal ki koi na kijiyo zinhaar

ki main ye kar ke fuzuli bahut ziyan dekha

na jaane kaun si saat chaman se bichhDe the

ki aankh bhar ke na phir su-e-gulsitan dekha

sune ko dekhe pa hum kis tarah se den tarjih

KHuda to hum ne suna hai tumhein butan dekha

ba-rang-e-ghuncha bahaar us chaman ki sunte the

pa jun hi aankh khuli mausam-e-KHizan dekha

na kahte the tujhe 'qaem' ki dil kisi ko na de

maza kuchh is ka bhala tu ne ai miyan dekha