main ki tanha etibar-e-zat khone se hua

maiñ ki tanhā e'tibār-e-zāt khone se huā

jo huā vo dil meñ shak kā biij bone se huā

ik zarā se dāġh-e-rusvā.ī kā itnā phailnā

aisā dāman ko kisī jaldī meñ dhone se huā

maiñ ne dekhā hai chaman se ruḳhsat-e-gul kā samāñ

sab se pahle rañg maddham ek kone se huā

maiñ hī bantā huuñ fasād-e-āb-o-gil kā har sabab

kis qadar nuqsān merā mere hone se huā

ek hañgāma huā jo raat ke aivān meñ

raushnī kā ḳhār-e-zulmat meñ chubhone se huā

kyā batā.ūñ kis tarah jaatā rahā zād-e-safar

ye ziyāñ bas ek pal raste meñ sone se huā

sar pe hī rahtā agar to sar kā bachnā thā muhāl

bojh merā kam ise har aan dhone se huā

zindagī ghistī rahī 'shāhīñ' basar hone ke saath

pairahan kā rañg phīkā roz dhone se huā

main ki tanha e'tibar-e-zat khone se hua

jo hua wo dil mein shak ka bij bone se hua

ek zara se dagh-e-ruswai ka itna phailna

aisa daman ko kisi jaldi mein dhone se hua

main ne dekha hai chaman se ruKHsat-e-gul ka saman

sab se pahle rang maddham ek kone se hua

main hi banta hun fasad-e-ab-o-gil ka har sabab

kis qadar nuqsan mera mere hone se hua

ek hangama hua jo raat ke aiwan mein

raushni ka KHar-e-zulmat mein chubhone se hua

kya bataun kis tarah jata raha zad-e-safar

ye ziyan bas ek pal raste mein sone se hua

sar pe hi rahta agar to sar ka bachna tha muhaal

bojh mera kam ise har aan dhone se hua

zindagi ghisti rahi 'shahin' basar hone ke sath

pairahan ka rang phika roz dhone se hua