main kis se karta yahan guftugu koi bhi na tha

maiñ kis se kartā yahāñ guftugū koī bhī na thā

nahīñ thā mere muqābil jo tū koī bhī na thā

ye ijz-e-zāt thā yā irtafā-e-husn-e-nazar

kabhī kabhī to mire chaar sū koī bhī na thā

ajiib us kī hai mahfil ki us kī mahfil meñ

pur-imtiyāz the sab surḳh-rū koī bhī na thā

maiñ kyā batā.ūñ ki us ḳhaak se huuñ vābasta

zamīn-e-dil meñ jahāñ nam numū koī bhī na thā

ye kaisī bastī hai vārid kahāñ huā huuñ jahāñ

nazīr-e-silsila-e-hāv-hū koī bhī na thā

chalo chaleñ ki yaqīn o gumāñ kī duniyā meñ

nafas nafīs sabhī dil lahū koī bhī na thā

maiñ ḳhud hī apne barābar khaḌā huā thā 'tūr'

bhare jahān meñ merā adū koī bhī na thā

main kis se karta yahan guftugu koi bhi na tha

nahin tha mere muqabil jo tu koi bhi na tha

ye ijz-e-zat tha ya irtafa-e-husn-e-nazar

kabhi kabhi to mere chaar su koi bhi na tha

ajib us ki hai mahfil ki us ki mahfil mein

pur-imtiyaz the sab surKH-ru koi bhi na tha

main kya bataun ki us KHak se hun wabasta

zamin-e-dil mein jahan nam numu koi bhi na tha

ye kaisi basti hai warid kahan hua hun jahan

nazir-e-silsila-e-haw-hu koi bhi na tha

chalo chalen ki yaqin o guman ki duniya mein

nafas nafis sabhi dil lahu koi bhi na tha

main KHud hi apne barabar khaDa hua tha 'tur'

bhare jahan mein mera adu koi bhi na tha