main kis tilism ke ghere mein hun pata bhi nahin

maiñ kis tilism ke ghere meñ huuñ patā bhī nahīñ

ki paañv chalte rahe rāsta kaTā bhī nahīñ

tirā ḳhayāl bhī aa.e to kis tarah aa.e

tirā ḳhayāl to dil se kabhī gayā bhī nahīñ

na jaane kaun ye andar chhupā huā hai mire

maiñ apne jism se itnā to āshnā bhī nahīñ

kareñ to kaise kareñ habs TūTne kī duā

ye vo dayār ki chaltī yahāñ havā bhī nahīñ

ye qarya kaun sā hai badduā ye kis kī hai

yahāñ to lab pe kisī ke koī duā bhī nahīñ

us ek shaḳhs kī har baat maan lī hai 'nadīm'

vo ek shaḳhs agarche mirā ḳhudā bhī nahīñ

main kis tilism ke ghere mein hun pata bhi nahin

ki panw chalte rahe rasta kaTa bhi nahin

tera KHayal bhi aae to kis tarah aae

tera KHayal to dil se kabhi gaya bhi nahin

na jaane kaun ye andar chhupa hua hai mere

main apne jism se itna to aashna bhi nahin

karen to kaise karen habs TuTne ki dua

ye wo dayar ki chalti yahan hawa bhi nahin

ye qarya kaun sa hai baddua ye kis ki hai

yahan to lab pe kisi ke koi dua bhi nahin

us ek shaKHs ki har baat man li hai 'nadim'

wo ek shaKHs agarche mera KHuda bhi nahin