main kisi shoKH ki gali mein nahin

maiñ kisī shoḳh kī galī meñ nahīñ

zindagī merī zindagī meñ nahīñ

ham vafā kī umiid kyā rakkheñ

kis meñ hogī jo aap hī meñ nahīñ

koī kaisā hai koī kaisā hai

ādamiyyat har aadmī meñ nahīñ

tazkira hī vafā kā suntā huuñ

ye kisī meñ hai yā kisī meñ nahīñ

us kā milnā hai apne khone par

fil-haqīqat ḳhudā ḳhudī meñ nahīñ

kis se pūchhūñ ki raat kyā guzrī

ahl-e-bazm apne hosh hī meñ nahīñ

vo ghaTā āsmān par uTThī

uzr ab mujh ko mai-kashī meñ nahīñ

guftugū un kī dostī meñ hai

shak hameñ un kī dushmanī meñ nahīñ

hai ḳhudī aur be-ḳhudī kuchh aur

be-ḳhudī kā maza ḳhudī meñ nahīñ

koī chilman uThā.e baiThā hai

koī apne havās hī meñ nahīñ

ġhaur se dekhiye to sab kuchh hai

kaun sī baat aadmī meñ nahīñ

ye bhī ho vo bhī ho to lutf aa.e

kuchh nahīñ laag agar lagī meñ nahīñ

kaun sā vasf kaun sī ḳhūbī

hazrat-e-'nūh-nārvī' meñ nahīñ

main kisi shoKH ki gali mein nahin

zindagi meri zindagi mein nahin

hum wafa ki umid kya rakkhen

kis mein hogi jo aap hi mein nahin

koi kaisa hai koi kaisa hai

aadamiyyat har aadmi mein nahin

tazkira hi wafa ka sunta hun

ye kisi mein hai ya kisi mein nahin

us ka milna hai apne khone par

fil-haqiqat KHuda KHudi mein nahin

kis se puchhun ki raat kya guzri

ahl-e-bazm apne hosh hi mein nahin

wo ghaTa aasman par uTThi

uzr ab mujh ko mai-kashi mein nahin

guftugu un ki dosti mein hai

shak hamein un ki dushmani mein nahin

hai KHudi aur be-KHudi kuchh aur

be-KHudi ka maza KHudi mein nahin

koi chilman uThae baiTha hai

koi apne hawas hi mein nahin

ghaur se dekhiye to sab kuchh hai

kaun si baat aadmi mein nahin

ye bhi ho wo bhi ho to lutf aae

kuchh nahin lag agar lagi mein nahin

kaun sa wasf kaun si KHubi

hazrat-e-'nuh-narwi' mein nahin