main kisi taur bana paya nahin kaam ka dukh

maiñ kisī taur banā paaya nahīñ kaam kā dukh

so mire paas bachā bhī to faqat naam kā dukh

aaj ham par yuuñ khulā gardish-e-ayyām kā dukh

jaise khultā hai janak-nandinī pe raam kā dukh

kis ko ma.alūm huā hai dil-e-nākām kā dukh

kis pe hotā hai ayaañ āḳhirī paiġhām kā dukh

ghar meñ baiThūñ to khaTaktī hai ḳhamoshī kī sadā

dasht ko jā.ūñ to rahtā hai dar-o-bām kā dukh

raushnī kā hī maiñ hissa thā magar ism-e-shafaq

mere hisse meñ rahā sub.h kā ġham shaam kā dukh

ek to sīñchne kā dard lahū se tujh ko

tis par ai shāḳh terī hasrat-e-gulfām kā dukh

aur sab kuchh to chale chhoḌ ke 'naqqāsh' miyāñ

rah gayā sar pe sar-e-shām sar-e-shām kā dukh

main kisi taur bana paya nahin kaam ka dukh

so mere pas bacha bhi to faqat nam ka dukh

aaj hum par yun khula gardish-e-ayyam ka dukh

jaise khulta hai janak-nandini pe ram ka dukh

kis ko malum hua hai dil-e-nakaam ka dukh

kis pe hota hai ayan aaKHiri paigham ka dukh

ghar mein baiThun to khaTakti hai KHamoshi ki sada

dasht ko jaun to rahta hai dar-o-baam ka dukh

raushni ka hi main hissa tha magar ism-e-shafaq

mere hisse mein raha subh ka gham sham ka dukh

ek to sinchne ka dard lahu se tujh ko

tis par ai shaKH teri hasrat-e-gulfam ka dukh

aur sab kuchh to chale chhoD ke 'naqqash' miyan

rah gaya sar pe sar-e-sham sar-e-sham ka dukh