main kisi zarre ko KHurshid nahin karta hun

maiñ kisī zarre ko ḳhurshīd nahīñ kartā huuñ

aur ḳhurshīd kī tardīd nahīñ kartā huuñ

shā'irī merī mirā ġham hai mirā apnā ġham

maiñ kabhī 'mīr' kī taqlīd nahīñ kartā huuñ

maiñ ne sochā thā bhalā hogā adab kā lekin

aisī hālat hai ki tanqīd nahīñ kartā huuñ

tere kahne se koī farq nahīñ paḌnā hai

maiñ to ḳhud apnī hī tā.īd nahīñ kartā huuñ

kyā patā mujh se tirī soch alag ho shāyad

mashvara detā huuñ tākīd nahīñ kartā huuñ

tū to merā hai mire yaar kam-az-kam tujh se

aisī bātoñ kī maiñ ummīd nahīñ kartā huuñ

ab mirā chāñd kahīñ aur chamaktā hogā

bas yahī soch ke maiñ 'iid nahīñ kartā huuñ

maiñ mujaddid bhī agar huuñ to suno dīvāno

maz.hab-e-‘ishq meñ tajdīd nahīñ kartā huuñ

main kisi zarre ko KHurshid nahin karta hun

aur KHurshid ki tardid nahin karta hun

sha'iri meri mera gham hai mera apna gham

main kabhi 'mir' ki taqlid nahin karta hun

main ne socha tha bhala hoga adab ka lekin

aisi haalat hai ki tanqid nahin karta hun

tere kahne se koi farq nahin paDna hai

main to KHud apni hi taid nahin karta hun

kya pata mujh se teri soch alag ho shayad

mashwara deta hun takid nahin karta hun

tu to mera hai mere yar kam-az-kam tujh se

aisi baaton ki main ummid nahin karta hun

ab mera chand kahin aur chamakta hoga

bas yahi soch ke main 'id nahin karta hun

main mujaddid bhi agar hun to suno diwano

mazhab-e-‘ishq mein tajdid nahin karta hun