میں کتنا تنہا ہوں کوئی میری زبان سمجھے نہ بات سمجھے

میں کتنا تنہا ہوں کوئی میری زبان سمجھے نہ بات سمجھے

نہ میرے دن کو وہ دن ہی مانے نہ رات کو میری رات سمجھے

میں جس کو اپنا سمجھ کے لمس حیات دیتا رہا خوشی سے

وہ مجھ کو مثل حباب مانے کرامت بے ثبات سمجھے

یہ سر زمیں خوش نما ہے اس میں بہت سے کوہ و دمن ہیں لیکن

کوئی ہزارا کہے اسے کیوں کوئی اسے کیوں سوات سمجھے

میں کیسے مانوں جو درد کی مے کشید کر کے پلائے ہر پل

وہ مجھ کو ہر سانس زیست مانے اور اپنی کل کائنات سمجھے

کسی کو کیا اب بتائیں عاصمؔ کہ زندگی مرگ مستقل ہے

وہاں یہ بھی سسکیاں سنی ہم نے جس کو شہر حیات سمجھے