main kya bataun kaisi pareshaniyon mein hun

maiñ kyā batā.ūñ kaisī pareshāniyoñ meñ huuñ

kāġhaz kī ek naav huuñ aur pāniyoñ meñ huuñ

chehre ke ḳhadd-o-ḳhāl meñ mahdūd maiñ nahīñ

ik aa.ina huuñ apnī hī hairāniyoñ meñ huuñ

dushvāriyoñ ko Thiik se samjhā nahīñ abhī

mushkil mirī yahī hai ki āsāniyoñ meñ huuñ

maujoñ se duur rah ke bhī badlā nahīñ nasīb

sāhil ke ās-pās bhī tuġhyāniyoñ meñ huuñ

mujh tak hī lauT aatī hai merī sadā kī guuñj

ik bāzgasht sā kahīñ vīrāniyoñ meñ huuñ

oḌhā huā hai maiñ ne ye kaisā ajab libās

itnā Dhakā huā huuñ ki uryāniyoñ meñ huuñ

raḳht-e-safar meñ kījiye merā shumār bhī

shāmil maiñ apnī be-sar-o-sāmāniyoñ meñ huuñ

main kya bataun kaisi pareshaniyon mein hun

kaghaz ki ek naw hun aur paniyon mein hun

chehre ke KHadd-o-KHal mein mahdud main nahin

ek aaina hun apni hi hairaniyon mein hun

dushwariyon ko Thik se samjha nahin abhi

mushkil meri yahi hai ki aasaniyon mein hun

maujon se dur rah ke bhi badla nahin nasib

sahil ke aas-pas bhi tughyaniyon mein hun

mujh tak hi lauT aati hai meri sada ki gunj

ek bazgasht sa kahin viraniyon mein hun

oDha hua hai main ne ye kaisa ajab libas

itna Dhaka hua hun ki uryaniyon mein hun

raKHt-e-safar mein kijiye mera shumar bhi

shamil main apni be-sar-o-samaniyon mein hun